ចាប់ផ្សឹកនិងឃាត់ខ្លួនព្រះសង្ឃ១អង្គ មានសារធាតុញៀននិងរក្សាទុកអាវុធល្មើសច្បាប់
19-December-2018 | ដោយ ពលមនសិការ
បាត់ដំបង៖ ព្រះសង្ឃមួយអង្គដែលពិនិត្យឃើញមានសារធាតុញៀន ក្នុងខ្លួនព្រមទាំងរក្សាទុកអាវុធល្មើសច្បាប់ជាច្រើនក្នុងរោងស្នាក់អាស្រ័យត្រូវបានកម្លាំងនៃអធិការដ្ឋាននគរស្រុកកំរៀងសហការជាមួយមន្ត្រីការិយាល័យធម្មការនិងសាលាអនុគណស្រុកចុះត្រួតពិនិត្យឃើញហើយចាប់ផ្សឹកបញ្ជូនទៅស្នងការខេត្តចាត់ការតាមនីតិវិធីច្បាប់។
ឧត្តមសេនីយ៍ត្រី ជេត វណ្ណនី ស្នងការទទួលផែនព្រហ្មទណ្ឌនៃស្នងការដ្ឋាននគរបាលខេត្តបាត់ដំបងបានឱ្យដឹងថា ក្នុងកិច្ចប្រតិបត្តិការរបស់ កម្លាំងនគរបាលស្រុកកំរៀង ជាមួយមន្ត្រីការិយាល័យធម្មការនិងសាលាអនុគណស្រុកចុះពិនិត្យទីស្នាក់អាស្រ័យរបស់ព្រះសង្ឃ១អង្គ រក្សាទុកនូវអាវុធល្មើសច្បាប់នេះដែរ ធ្វើឡើងនៅវេលាម៉ោង១១និង៣០នាទី ថ្ងៃទី១៨ ខែធ្នូ ឆ្នាំ២០១៨ ស្ថិតនៅចំណុចភ្នំ៨២ ក្នុងភូមិចាំចាប ឃុំបឹងរាំង ស្រុកកំរៀង ខេត្តបាត់ដំបង។
ជាមួយគ្នាក្នុងការចុះពិនិត្យខាងលើនេះដែរកម្លាំងនិងមន្ត្រីពាក់ព័ន្ធសម្រេចនាំខ្លួន ព្រះភិក្ខុសង្ឃ០១អង្គព្រះនាម ហ៊ុន អង គង់នៅលើភ្នំ៨២ ដើម្បីពិនិត្យនិងព្យាបាលជំងឺឲ្យអ្នកស្រុក និងមានដាស់មន្តអាគមផ្សេងៗមួយចំនួនទៀតមកផ្សឹកតាមបែបសាសនាដោយចោទប្រកាន់ពីបទកាន់កាប់និងរក្សាទុកអាវុធដោយខុសច្បាប់។
ក្នុងហេតុការណ៍នេះក្រុមគណកម្មកាត្រួតពិនិត្យបានរកឃើញវត្ថុតាងល្មើសច្បាប់រួមមានៈ កាំភ្លើងប៉េអាកុលកែច្នៃ០១ដើម, កាំភ្លើងច្នៃបាញ់គ្រាប់កង់០១ដើម, គ្រាប់k៥៩មួយគ្រាប់, គ្រាប់k៥៤បីគ្រាប់, គ្រាប់ប៉េអាកុល០៤គ្រាប់, ខ្នោះ០១គូរ, ដាវ០១ដើម, ជំពុះទុងកាំភ្លើង០១, មួកនគរបាល០១ វិទ្យុទាក់ទង០១គ្រឿង, ដបជក់ថ្នាំញៀនចំនួន០១ និងដែកកេះ០១ផងដែរ។
បច្ចុប្បន្នជនសង្ស័យក្រោយពីផ្សឹករួចរួមនិងវត្ថុតាង ត្រូវបានសមត្ថកិច្ចជំនាញកសាងសំណុំរឿងបញ្ជូនបន្តទៅតុលាការ ដើម្បីចាត់ការតាមនីតិវីធី ៕ (SN-ចេស្តា)
ចំនួនអ្នកទស្សនា
- ថ្ងៃនេះ10481
- ម្សិលមិញ11441
- សប្តាហ៍នេះ40311
- ខែនេះ155461
- ឆ្នាំនេះ155461
- សរុប20597917